షాకింగ్.. ఏకంగా సముద్రమే మాయమైంది

మనభారత్ న్యూస్, 10 ఫిబ్రవరి 2024 :-  వాతావరణ మార్పులు కారణంగా పెరుగుతున్న ఉష్ణోగ్రతల వల్ల భూమి, ప్రజలు చాలా మార్పులు చూడాల్సి వస్తుందని ఇప్పటికే ప్రకటించింది వరల్డ్ ఎకనమిక్ ఫారమ్. అందుకు తగ్గట్టుగానే ఇప్పుడో ఆశ్చర్యకరమైన విషయం వెలుగులోకి వచ్చింది. ఏకంగా ఓ సముద్రం భూమిపై నుంచి మాయమైంది.

అవును.. ఆశ్చర్యంగా అనిపించినప్పటికీ ఇదే నిజం. ఈ భూగోళం పైనుంచి ఏకంగా ఓ సముద్రం మాయమైంది. దాని పేరు అరల్ సముద్రం.

కజకిస్తాన్, ఉజ్బెకిస్తాన్ మధ్య ఉన్న సముద్రం ఇది. దీని విస్తీర్ణం అక్షరాలా 68వేల చదరపు కిలోమీటర్లు. ప్రపంచంలోని నాల్గవ-అతిపెద్ద అంతర్గత నీటి వనరు ఇది. 1960లలో సోవియట్ యూనియన్, వ్యవసాయం కోసం నదుల అనుసంధానం మొదలుపెట్టింది. ఇందులో భాగంగా అరల్ సముద్రంలోకి రావాల్సిన కొన్ని నదుల దారి మళ్లించింది.

దీంతో 290 కిలోమీటర్ల మేర విస్తరించిన ఈ సముద్రం, 50 ఏళ్లలో అంతరించిపోయింది. ఒకప్పుడు సోవియట్ నౌకలు తిరిగిన సముద్రం, ఇప్పుడు ఇసుకతో కనిపిస్తోంది. దశాబ్దాల కిందట మునిగిన నౌకలన్నీ ఇప్పుడు తేలాయి.

సైంటిస్టుల అంచనా ప్రకారం 2 మిలియన్ సంవత్సరాల కిందట ఏర్పడిన సముద్రం ఇది. ఇప్పుడిది 50 ఏళ్లలో కనుమరుగైంది. మిగిలిన భాగాన్ని కాపాడ్ం కోసం, అరల్ సముద్రం ఉత్తర-దక్షిణ భాగాల మధ్య ఒక ఆనకట్టను నిర్మించింది కజకిస్తాన్. కానీ ఇప్పటికే జరగాల్సిన నష్టం జరిగిపోయింది. ఈ సముద్రాన్ని పునరుద్ధరించడం ఇప్పుడు అసాధ్యం అంటున్నారు శాస్త్రవేత్తలు